AE day when Jove, the high director,
Was merry o'er a bowl of nectar,
Resolv'd a present to bestow
On the inhabitants below.
Momus, wha likes his joke and wine,
Was sent frae heaven with the propine.
Fast throw the aether-fields he whirl'd
His rapid car and reach'd the warld.
Conveen'd mankind and told them Jove
Had sent a token of his love.
Considering that they were short sighted,
That faut shou'd presently be righted.
Syne loos'd his wallet frae the pillions
And toss'd out spectacles by millions.
There were enow and ilk an chose
His pair and cock'd them on his nose.
And thankfully their knees they bended
To heaven that thus their sight had mended.
Streight Momus hameward took his flight,
Laughing fou' loud, as well he might.
For ye maun ken, 'tis but o'er true,
The glasses were some red, some blue,
Some black, some white, some brown, some green,
Which made the same thing different seem.
Now all was wrong, and all was right,
For ilk believ'd his aided sight
And did the joys of truth partake
In the absurdest gross mistake.
Ae day whan Jeuve, the heich director,
Wes merry ower a bool o nectar,
Resolved a present ti bestaw
On the inhabitants ablaw.
Momus, wha likes his joke an wine,
Wes sent frae heiven wi the propine.
Fast throwe the aether-fields he whirled
His rapid car an reaked the warld.
Conveened mankind an told thaim Jeuve
Haed sent a taiken o his leuve.
Considerin that thay war short sichtit,
That faut shoud presently be richtit.
Syne lowsed his wallet frae the pillions
An tossed oot spentacles bi millions.
Thare war enew, an ilk ane chose
His pair an cockt thaim on his nose.
An thankfully thair knees thay bendit
Til heiven that thus thair sicht haed mendit.
Straucht Momus hameward teuk his flicht,
Lauchin fou lood, as weel he micht.
For ye man ken, 'tis but ower true,
The glesses war some reid, some blue,
Some black, some white, some broon, some green,
Whilk made the same thing different seem.
Noo aw wes wrang, an aw wes richt,
For ilk believed his aidit sicht
An did the joys o truith pairtek
In the absurdest gross mistek.